Sabtu, 15 Februari 2014

TANGKI SURAYA

Cerita kali ani berkenaan dengan pengalaman ku semasa berada di Tangki Suraya. Sebenarnya tangki ani bukanlah SURAYA namanya tapi oleh sebab ada seorang perempuan yang bernama Suraya di jumpai mati di sana pada tahun penghujung tahun 70an tarus tah orang menggalar tangki Suraya.
Ada 2 versi cerita tentang tangki Suraya cerita pertama si Suraya ani kana rogol lalu di bunuh di sana dan yang paling seram lagi mendangar cerita mayatnya di putung putung lalu di buang lah berdekatan dengan kawasan tangki atu. Cerita kedua si Suraya ani mati di bunuh di rumahnya dan mayatnya di buang di sana untuk beberapa lama (inda tau berapa lama) sampailah di jumpai mayatnya di sana. Selepas kejadian atu bermacam macam lah kejadian misteri yang berlaku. Ada orang becerita yang hantu si Suraya ani selalu mengacau orang yang tinggal di kawasan mabohai, ong sum ping dan kumbang pasang. Ada jua cerita mengatakan asal saja malam hari si Suraya ani akan mengatuk pintu rumah orang sambil ia minta tulung minta antar balik ke rumahnya. Mendangar cerita jua ia akan minta antar ke tangki atu, seolah olah memberitahu yang ia atu ada di sana. Walaupun terdapat dua versi cerita pasal tangki atu tapi yang penting dalam cerita atu memang pernah terjadi seorang perempuan yang bernama Suraya di temui mati disana. Macamana ia mati, Wallahualam hanya tuhan yang lebih mengetahui.
Kali ani aku kan becerita tentang pengalaman ku berada di sana. Masa tahun 2003 atau 2004 mendangarlah jua ku cerita pasal tangki Suraya ani. Dari mulut kawan kawan ku tempat tangki ani kebilangan berhantu sampai penjaga keselamatan yang menjaga di sana atu pun ramai yang inda sanggup. Aku pun yang banarnya inda jua tau sangat pasal tangki yang terletak di lebuh raya mabohai ani walaupun yang banarnya aku membesar di kawasan kg mabohai. Macam macamlah cerita ku dangar dari bisdia ani, ada orang pernah berjumpa Pontianak lah, hantu perempuan inda bekepala sama ada kereta di tahan oleh perempuan misteri berdekatan laluan masuk ke tangki atu konon kononnya kereta perempuan atu rusak dan bermacam macam cerita.
Aku ani jenisnya inda akan mengiyakan sesebuah cerita kalau aku inda pernah mengalami atau aku mesti sendiri meliat dengan mata kepala ku. Bukannya sombong kadang kadang cerita cerita hantu ani sengaja di reka untuk menakut nakut kan orang untuk kepentingan sendiri.
Entah bilakah tahun nya or masanya aku sendiri melawat ke tangki atu. Masa ku menuju masuk ke tangki atu memanglah ku rasa seram pasalnnya punyalah gelap jalan nya masa atu. Yang dapat ku lihat dari jauh cuma lampu pondok keselamatan orang yang di tugaskan untuk menjaga tangki atu saja. Dari jauh sudah nampak tangki berkenaan tapi sebenarnya si Suraya ani di jumpai mati bukanlah di tangki atu tapi di kawasan jalan menuju ke tangki berkenaan. Bila ku kanang kanang atu entah macamana timbul tia rasa takut ku atu pasalnya masa ku memikirkan pasal cerita si suraya ani entah dari mana datangnya sehelai kain putih terabang melintasi lurus lurus dapan ceramin kereta ku. Melabuk jantungku kekajutan..tebe​ranti nyawa sekajap. Karau ne rasa muka ku ah. Ia melintas lagi perlahan lahan , mun laju ada jua alasan barangkali aku salah liat ani luan luan nyata bah ia melintas.
Masa atu yang aku terpikir cuma satu, patah balik jangantah di pajal. Semasa ku kan mengundur kan kereta inda semana semana aku macam melanggar sesuatu, melabuk kuat bunyinya bawah kereta ku ani. Makin tia ku ketungkalan, tarus becurahan keluar ne air paluh dari dahi ani. Menyangkut bunyinya di bawah kereta ku, inda ku peduli tarus jalankan saja keretaku. Masih ne irit irit bunyinya bawah kereta ku ani, sudah kan sampai simpang ke jalan basar bunyi yang menyangkut ani pun hilang. Tarus ku memberantikan kereta ku, memandangkan kawasan atu tarang sedikit aku pun ada beranilah jua kan melihat apa geranganya yang menyangkut bawah kereta ku ani.
Semasa ku turun dari kereta dapat ku mencium bau yang kurang menyenangkan. Buruk banar baunya, ku lihat bawah keretaku ani kulihat nada papa. Semasa ku kan menoleh ke belakang ada tia bunyi macam bini bini bedaham “hmmmmmm..hheee​ emmmmmmm” bunyinya. Tarus kambang buluku, dalam hati ani yang banarnya indakan mau menulih bah dari mana datangnya bunyi atu. Tapi gatal tah jua hati ani kan mau tau dari mana datang bunyinya pasalnya bunyi atu terlampau dakat.
Bebunyi lagi ia “hhhheeeemmmmm…​hhheeeeemmm hheeeeemm” makin kuat bunyinya. Tarus ku toleh kebelakang . Ya Allah…kan tecabut rasa batis ku, kan tanggal jua rasa jantungku bila ku melihat apa gerangannya yang bedaham ani.
Kain nya putih, rambutnya ani berwarna keputih putihan dan tangan nya ani macam melambai lambai aku. Mukanya inda pulang kelihatan tapi cukup tah udah tu membuat aku kan belusir. Inda tah ku menunggu lama tarus ku masuk kedalam kereta. Masa ku masuk dalam kereta atu dapat ku mendangar ia mengilai ketawa dengan nyaring. Kalau kamu pernah mendangar Suzzana ketawa dalam cerita Sundal Bolong iatah udah tu, kan sama tu bunyinya. Aku pun berambus dengan capatnya dari kawasan atu.
Aku inda mengatakan yang hantu ku jumpa atu hantu si Suraya. Barangkali hantu yang ku jumpa atu sebenarnya makhluk halus yang menetap di sana, lagi pun tempat atu memang sunyi dan menyeramkan dan inda mustahil banyak makhluk halus yang menetap di sana untuk menakut nakutkan manusia. Bila manusia sudah percaya tempat atu berhantu lebih senanglah iblis dan syaitan memainkan peranannya untuk menyesatkan manusia. Wallahualam’
Firman Allah maksudnya :
“Allah SWT memegang jiwa (ruh) ketika matinya (seseorang) dan memegang jiwa(ruh) orang yang belum mati di waktu tidurnya, maka Dia tahanlah jiwa yang lain sampai waktu yang ditentukan..” ( Az-Zumar : 42 ).
===============​=SEKIAN========​===========

3 ulasan:

  1. Belum Pernah Menang Dalam Bermain Poker Online ???
    Atau Ingin Mendapatkan Penghasilan Tambahan Dengan Modal Yang Sangat Minim???
    Segera Daftarkan ID Anda di SmsQQ Yang MerupakanAgen Judi Online Terpercaya

    Solusi Yang Tepat Hanya di www(.)SmsQQ(.)com

    Kelebihan dari Agen Judi Online SmsQQ :
    - Tidak ada settingan apapun dalam permainannya 1000%
    - Minimal Deposit Hanya Rp.10.000
    - Proses Setor dan Tarik Dana akan di selesaikan dengan cepat,tepat dan akurat.Hanya memerlukan waktu 1-2 menit (Jika Tidak Ada Gangguan)
    - Kebanjiran Bonus disetiap Harinya
    - Bonus Turnover 0.3%-0.5%
    - Bonus Refferal 20% (Seumur Hidup)
    -Customer Service bersedia melayani Anda Selama 24 jam dengan pelayanan yang begitu sopan dan ramah.
    - Berkerja sama dengan 4 bank lokal : BCA-MANDIRI-BNI-BRI

    7 Permainan Dalam 1 ID :
    Poker - BandarQ - DominoQQ - Capsa Susun - AduQ - Sakong - Bandar Poker

    Untuk Info Lebih Lanjut Dapat menghubungi Kami Di :
    BBM: 2AD05265
    WA: +855968010699
    Skype: smsqqcom@gmail.com

    Tunggu Apa Lagi Bosku ?

    BalasPadam
  2. lain kli klau kurang pasti atu suraya kh spa, minta lh liatkn ic

    BalasPadam